କୁଦରେମୁଖ ଜାତୀୟ ଉଦ୍ୟାନର ଘଞ୍ଚ ଜଙ୍ଗଲ ଘେରା ପାହାଡ଼ିଆ ଅଞ୍ଚଳରେ ଐତିହାସିକ ଭାବେ ବନବାସୀ ରୂପେ ରହି ଆସୁଥିବା ସମ୍ପ୍ରଦାୟଗୁଡ଼ିକ ଅତ୍ୟାବଶ୍ୟକ ମୌଳିକ ସୁବିଧାରୁ ବଞ୍ଚିତ ରହିଛନ୍ତି । ଏମାନଙ୍କ ମଧ୍ୟରେ କୁତଲୁରୁ ଗାଁରେ ରହୁଥିବା ମାଲେକୁଡ଼ିୟା ସମ୍ପ୍ରଦାୟ ମଧ୍ୟ ସାମିଲ ରହିଛି, ଯେଉଁମାନଙ୍କର ୩୦ଟି ଘରକୁ ଆଜି ସୁଦ୍ଧା ବିଦ୍ୟୁତ ସଂଯୋଗ କିମ୍ବା ଜଳଯୋଗାଣ ହୋଇପାରିନାହିଁ। କର୍ଣ୍ଣାଟକର ଦକ୍ଷିଣ କନ୍ନଡ଼ ଜିଲ୍ଲା ଅନ୍ତର୍ଗତ ବେଲତାଙ୍ଗଡ଼ି ତାଲୁକାର ଅଧୀନରେ ଆସୁଥିବା କୁତଲୁରୁର ଚାଷୀ ଶ୍ରୀଧର ମାଲେକୁଡ଼ିୟା କୁହନ୍ତି, ‘‘ସ୍ଥାନୀୟ ଲୋକଙ୍କ ପାଇଁ ଖୁବ ଅଧିକ ବିଦ୍ୟୁତ ଚାହିଦା ରହିଛି।’’
ଆଠ ବର୍ଷ ପୂର୍ବରୁ, ଶ୍ରୀଧର ତାଙ୍କ ଘରକୁ ଆଲୋକିତ କରିବା ଲାଗି ଗୋଟିଏ ପିକୋ ହାଇଡ୍ରୋ ଜେନେରେଟର୍ କିଣିଥିଲେ। ତାଙ୍କ ଭଳି ଗାଁର ଅନ୍ୟ ୧୧ଟି ପରିବାର ସେମାନଙ୍କର ନିଜସ୍ୱ ବିଦ୍ୟୁତ ଉତ୍ପାଦନ ଲାଗି ଜେନେରେଟର୍ କିଣିଛନ୍ତି। ‘‘ଅନ୍ୟ ଘରଗୁଡ଼ିକରେ କିଛି ନାହିଁ - ବିଦ୍ୟୁତ, ଜଳବିଦ୍ୟୁତ, କିମ୍ବା ଜଳ ଯୋଗାଣ ଆଦୌ ନାହିଁ।’’ ବର୍ତ୍ତମାନ ଗାଁର ୧୫ଟି ଘରେ ପିକୋ ହାଇଡ୍ରୋ ମେସିନରୁ ଜଳ ବିଦ୍ୟୁତ ଉତ୍ପାଦନ ହେଉଛି । କ୍ଷୁଦ୍ର ଜଳ ଟର୍ବାଇନରୁ ୧ କିଲୋୱାଟ୍ ବିଦ୍ୟୁତ ଉତ୍ପାଦନ ହୋଇଥାଏ ଯାହାକି ଗୋଟିଏ ଘରେ କେତୋଟି ବଲ୍ବ୍ ଜଳିବା ପାଇଁ ଯଥେଷ୍ଟ ।
ଜଙ୍ଗଲ ଅଧିକାର ଆଇନକୁ କାର୍ଯ୍ୟକାରୀ ହେବାର ୧୮ ବର୍ଷ ପୂରି ଯାଇଥିଲେ ସୁଦ୍ଧା କୁଦରେମୁଖ ଜାତୀୟ ଉଦ୍ୟାନରେ ରହୁଥିବା ଲୋକମାନଙ୍କ ପାଇଁ ଏହି ଆଇନ ଅଧୀନରେ ଅନୁମୋଦନ କରାଯାଇଥିବା ଜଳଯୋଗାଣ, ସଡ଼କ, ବିଦ୍ୟାଳୟ ଓ ଡାକ୍ତରଖାନା ଭଳି ମୌଳିକ ସୁବିଧା ମିଳି ପାରିନାହିଁ । ସେଥିମଧ୍ୟରୁ ବିଦ୍ୟୁତ ଏପରି ଏକ ସୁବିଧା, ଯାହା ପାଇଁ ଅନୁସୂଚିତ ଜନଜାତିର ମାଲେକୁଡ଼ିୟା ସମ୍ପ୍ରଦାୟ ଲୋକମାନଙ୍କୁ ସଂଘର୍ଷ କରିବାକୁ ପଡ଼ୁଛି।
ଉପସଂହାର : ୨୦୧୭ରେ ଏହି ଭିଡିଓ ପ୍ରସ୍ତୁତ କରାଯାଇଥିଲା। କୁତଲୁରୁ ବର୍ତ୍ତମାନ ସୁଦ୍ଧା ବିଦ୍ୟୁତ ସଂଯୋଗରୁ ବଞ୍ଚିତ ରହିଛି ।
ଅନୁବାଦ : ଓଡ଼ିଶାଲାଇଭ୍
